上圖是ViuTV劇集《二月廿九》的劇照，吳海昕（Sofiee）飾演的Yeesa，成功入屋，更被網民封為新一代女神。看圖，大概Get到其「封神」原因吧。

「因為Yeesa好平易近人，激發到觀眾嘅保護慾，但我只係得喜怒無常似佢，我係處女座，一諗到就會做，一啲都唔優柔寡斷。」

為了夢想，吳海昕大學畢業後，當了四年空姐，才於一四年參選港姐，大熱倒灶但獲稱「民間港姐」。載浮載沉六年，到三十歲才叫有番鋪代表作，沒再FF也是正常吧。

「我鍾意演戲，但做得呢行，就預咗係高風險投資，付出同成果一定唔成正比。娛樂圈係鬥長命嘅，每當我想放棄，就會醒起有前輩同我講過，我會有一百萬倍嘅回報，但係嗰一日未到。喺嗰日到之前，我都會繼續做。」
「長命」也需要本錢，仍居於公屋的她，獲得家人的
無限量支持，才是無價。

太陽從海上升起

不是發明星夢，吳海昕入娛樂圈，是確實地為了演戲，她曾稱，因為選擇跟張曼玉一樣的入行途徑，才會參選港姐。「講張曼玉係好Presentable（體面）嘅！其實選港姐，係一嚟就知道自己嘅quality去到邊，好快知道大眾對我有咩評價，只要我過到自己嘅心理關口，有勇氣對住幾百萬人就得。」
一四年的港姐選舉，她可算是頂頭大熱，惟最終三甲不入，僅得安慰多於實際的「旅遊大使獎」，及「民間港姐」的稱號。「輸咗比賽之後，我問自己，面對呢個咁大嘅失敗，可唔可以企番起身？咁我都豁咗出去，唔爭在豁多啲，所以就攞住僅有嘅身家，去紐約讀Film Acting。雖然只係讀三個月，但係美國使費貴、稅又重，咁短時間就使咗十幾萬，不過都係我夢寐以求嘅。」
訪問期間，吳海昕經常提及星座、風水，原名吳凱欣的她，就是因而改名。「我係好迷信嘅人，好信命運，咁命運包括埋風水，年紀愈大愈信添！我冇特定睇邊一個師傅，有時仲會Google自學點樣去擋煞。當年（一八年）簽新公司，我想有個新開始，所以就改名囉。o依家個名，『有大海上升起嘅太陽』嘅意思，即係日出咁解，我好鍾意。
「佢（風水師）講咗好多嘢，我最記得係佢叫我近多啲屬火嘅人，咁啱改完名冇耐，我就接咗港台嘅《火速救兵》，係講消防員嘅劇，真係寧可信其有！」